(((((((لييه التشدد ده . الاسلام ماقلش كده))))))))

السبت مايو 15, 2010 5:05 pm

((لييه التشدد ده ))

وانا عايزه اتكلم وادردش معاكم فى التشدد

وبعتذر لانى توقفت عن اللغة العربيه

رغم عشقى لها

الا ان البعض لايفهمها

فاحببت ان اتواصل معكم كما انا باللغة العامية المصريه

وباسلوب سهل مبسط حتى تتجاوبن معى جميعا

التشدد الاسلام ماقالش كده

لو شفنا واحده منتقبه فى الشارع حاطه وشها فى الارض نقول متشدده

مين قالك انها متشدده وان الاسلام ما قالش كده فعلا والا احنا خلاص

بقينا كلنا بنفتى من غير علم

مع ان الفتوى دى لاهلها والتاليف فيها اثم كبير

لو شفنا واحد ملتحى نقول دى سنه والسنه مش لازم تتعمل

وهاتى الدليل

ولو جبت الدليل بنسمع كلام نفسنا وبس

كان فيه حاجه فى دماغنا مش عايزين نغيرها

او بنكابر فى الغلط

اللحيه حكمها فرض

والدليل ((من القران الكريم ))وما اتاكم الرسول فخذوه ومانهاكم عنه فانتهوا

الدليل الثانى ((قال يا بن ام لاتاخذ بلحيتى ولا براسى ))

والدليل من السنه ((قوله صلى الله عليه وسلم ))حفوا الشوارب واوفروا اللحى ))او كما قال صلوات ربى وتسليماته عليه
((اطلقوا اللحية وقصوا الشارب وخالفوا المجوس))
التوضيح ((اى حاجه الرسول قالنا عليها نعملها يبقى امر وفرض علينا نعملها

زى ما ربنا امر وقال خذوا وانتهوا فده امر وواضح جداا

فى الدليل التانى موسى عليه السلام قال لاخوه بلحيتى ومعنى كده انه كان ملتحى

والرسول صلى الله عليه وسلم امرنا باتباع الانبياء وان دول قدوتنا

يبقى الموضوع فعلا فرض ودول مش متشددين ومش ارهابيين

النقاب بقى فى خلاف بين العلماء

والجمهور على انه فضيله

وعلماء عصرن على انه فريضه

وقله من قالوا بانه سنه

لو اخذنا على انه فضيله

حررام بقى الواحده تنتقب ليه بنحكم عليها دايما انها متشدده ووو الخ

واحد مابيسمعش اغانى وبيقول انها حرام

بقى متشدد طب ماهى فعلا حرام

والرسول الكريم نهى عنها عن الخمر والحرير والمعازف

اما الناس اللى بتسند الى قول ابن حزم

فابن حزم هو امام الظاهريه وعلشان كده اسمه ابن حزم الظاهرى ودول بياخدوا بس

بالظاهر مش اكتر

والعلماء اعتبروها زلة من زلاته

لما ييجى واحد ويقول انا من حقى اغير دينى ((الاسلام ))اقصد طبعا

ونقوله لا حرام وقدامك خيارين يا ترجع وتتوب ونحاول معاه 3 مرات

يا اما القتل

نقول ليه التشدد ده كل واحد حر

لا ياجماعة والله مش حر

الرسول صلى الله عليه وسلم قال ((من بدل دينه فاقتلوه ))

وفى معنى حديث اخر يستتاب ثلاث مرات والا فيقتل

وماكان لمؤمن ولا مؤمنه اذا قضى الله ورسوله امرا ان يكون لهم الخيرة من امرهم

بمعنى لما ربنا او الرسول يقضوا فى ار معيين ما ينفعش احنا نختار اللى يمشى على هوانا

احنا نقول بس سمعا وطاعه

لما مسلم يقتل مسلم

المفروض يتقتل

قدام كل الناس

بقى تشدد

مع ان لو ده حصل ما حدش هايتجرا يقتل مره تانيه

لو سرق نسجنه شهرين ونطلعه يسرق تانى

ماينفعش طبعا نقطع ايده علشان تشدد

ويا عينى وياحرام

يا جماعه الاسلام دين الرحمه عمره ماكان تشدد ابدا

دين اليسر عمره ماكان تشدد ابدا

بالعكس عقوبته رادعه وزاجره ولو عملنا باللى ربنا قاله ماكانش ده بقى حالنا

لكن فيه حاجه اسمها ترهيب وترغيب

يعنى لو انا شفت مثلا واحده بتسمع اغانى

ممكن اقولها بابتسامه على فكره ياقمر ماتسمعيش اغانى تانى

انا اعرف انها حراموالدليل كذا وكذا

ايه رايك تجربى تسمعى نشيد نروح تحفيظ مثلا تبداى تصاحبيها وتعينيها على الطاعه

ده اسمه ترغيب بخليها ترغب فى الطاعه وتبعد عن المعاصى وده اسلوب جمييل لكن مابينفعش كل الاشخاص

فى ناس تانيه ماينفعش معاها الا الترهيب

وده بقى لو حكيتى ليها مثلا اهوال يوم القيامه واللى بيحصل فى القبر وفى المغاسل وهكذا

فتلاقى الترهيب جاب معاها نتيجه وتبدا تقرب لربنا

اذن

مش اسمه تشدد اسمه ترهيب وترغيب

كده عرفنا الاتنين

التشدد بقى فى الاسلام زى مثلا لو انتى على سفر تقصرى الصلاه دى رخصه ربنا ادهالك

تقصرى وتجمعى

ظهر وعصر ومغرب وعشا

ركعتين ركعتين عدا المغرب لانها وتر

ربنا بيحب ان تؤتى رخصه كما تاتى عزائمه

تيجى واحده وتقولك لاء

انا هصلى الاربعه وفى ميعادهم

انتى اهو اللى شددتى على نفسك

وفاكره انك كدههاتاخدى زياده فى الثواب

يا جماعه الاسلام دين عطف دين حب دين تسامح

دين لو طبقنا تعاليمه

هانروح اجمل مكان

لا يخطر على قلب بشر

تعالوا يلا نضغط على نفسنا شويه

علشان ربنا يجعلنا من عتقائه من لنار

اوعوا تزعلوا منى لانى طولت عليكم

انا بس كنت عايزه اوضح ليكم

النقطه دى

السبت مايو 15, 2010 7:01 pm

ديننا يسر بطبيعته
جزاكى الله خيرا
الله يرضى عنك

(((((((لييه التشدد ده . الاسلام ماقلش كده))))))))

(((((((لييه التشدد ده . الاسلام ماقلش كده))))))))

رد: (((((((لييه التشدد ده . الاسلام ماقلش كده))))))))